BUXTORFIUS J. Jacobus

BUXTORFIUS J. Jacobus

Iohannis Iunioris fil. vix novemdecennis in Magni Parentis, spirantis adhuc et successorem heredemque suum, in quo post fata superstes mansurus esset, locô suô videre laetantis, vicem ab utriusque Ordinis Proceribus surrogatus: Patre paulo post inter Caelites relatô, per Germaniam, Belgium, M. Britanniam Galliamque peregrinatione institutâ, ubiqueve Viris dignitate ac eruditione Illustribus innotuit; in Anglia praecipue nominis ac virtutum suarum cultores nactus. Inde feliciter domum redux, Virginem Lectissimam, Cleophen Brandmylleriam, Ampliss. Viri Iac. Brandmylleri ICti supra dicti filiam unicam, sibi stabili connubiô iunxit. Academiae Rauricae Rectoratum semel, Ordinis sui Decurionatum saepius, magna cum prudentiae ac dexteritatis laude gessit. Paterna quaedam emendatius edidit, alia ipse ad praelum parata habet, inter quae Abbreviaturae Hebraicae et Bibliotheca Rabbinica aucta et locupletata, propediem lucem videbunt. Natus est die 14. Sept. 1645.